Hrund og Sonja María Íslandsmeistarar stúlkna

Hrund Hauksdóttir og Sonja María Friðriksdóttir urðu í dag Íslandsmeistarar stúlkna.   Hrund í flokki stúlkna fæddra 1994-96 og Sonja María í flokki stúlkna fæddra 1997 og síðar.  Sonja sigraði Veroniku Steinunni Magnúsdóttur í einvígi 2-1 en þær komu jafnar í mark í yngri flokknum.  Sonja María hefur tryggt sér þátttökurétt á NM stúlkna sem fram fer í Reykjavík í apríl.

 

Eldri flokkur:

Þar voru aðeins 2 keppendur og tefldu einvígi.  Hrund Hauksdóttir sigraði Huldu Maríu Finnbogadóttur 4-0.  Hrund vann allar skákirnar gegn Huldu Rún nokkuð örugglega og er án efa sú allra besta á landinu sem enn er í grunnskóla.

Yngri flokkur:

16 skákkonur tóku þátt.   Þar komu Veronika Steinunn Magnúsdóttir og Sonja María Friðriksdóttir jafnar í mark en háðu aukakeppni um Íslandsmeistaratitilinn.  Þar var jafnt 1-1 og því var tefld viðbótarskák þar sem Sonja hafði betur.   Hildur Berglind Jóhannsdóttir varð í þriðja sæti.

Stúlkurnar skiptust á að sigra hverja aðra framan af móti og eftir fjórar umferðir hafði aðeins Veronika Steinunn lagt alla andstæðinga sína að velli. Nokkrar stúlkur komu í humátt eftir henni með 3 vinninga. Í fimmtu umferð mættust svo þær stöllur Veronika Steinunn og Sonja María í sinni fyrstu skák í mótinu. Sonja vann þá skák og komst þar með upp að hlið Veroniku. Þær unnu svo báðar sínar skákir í 6. umferð og voru því efstar og jafnar fyrir lokaumferðina. Veronika, sem tefldi á köflum frábærlega, vann sína skák örugglega á meðan Sonja María sat uppi með gjörtapað tafl gegn Doniku Kolica. Með sigri hefði Donika tryggt sér annað sæti mótsins. Sonja María sýndi hins vegar mikla seiglu og náði að máta Doniku og þar með tryggja sér einvígi gegn Veroniku. Sonja reyndist sterkari í einvíginu sem hún hafði eins og áður segir í bráðabana. Hrósa ber öllum stúlkunum fyrir hina ágætustu taflmennsku á köflum og í því skyni er rétt að nefna glæsilega biskupsfórn Veroniku Steinunnar þegar hún fórnaði Biskup á h7 sem leiddi til liðsvinnings í nokkrum leikjum.

Lokastaðan í yngri flokki:

 

Rk.	Name	Club/City	Pts.
1	Magnusdottir Veronika Steinunn	TR - Melaskóla	6
2	Fridriksdottir Sonja Maria	Hjallaskóla	6
3	Johannsdottir Hildur Berglind	Hellir - Salaskóla	5
4	Mobee Tara Soley	Hellir - Hjallaskóla	4
5	Kolica Donika	TR - Hólabrekkuskóla	4
6	Palsdottir Soley Lind	TG - Hvaleyrarskóla	4
7	Juliusdottir Asta Soley	Hellir - Hjallaskóli	4
	Olafsdottir Asta Sonja	Hellir - Hjallaskóla	4
9	Bargamento Honey Grace	Engjaskóla	4
10	Gautadottir Aldis Birta	Engjaskóla	3
11	Robertsdottir Rosa Linh	Engjaskóla	3
12	Adalsteinsdottir Asdis Eik	Engjaskóla	3
13	Freygardsdottir Solrun Elin	TR - Árbæjarskóla	3
14	Freygardsdottir Halldora	TR - Árbæjarskóla	1,5
15	Hauksdottir Heidrun Anna	Fjölnir - Rimaskóla	1
16	Eidsdottir Eyrun Margret	UMSB - Borgarnes	0,5

Skákstjóri var Páll Sigurðsson.   

Umgjörð á mótinu var öll hin besta og heimamönnum til sóma.   

Chess-Results